Лондонда тарихий кун: Ўзбекистон активлари жаҳон капитал бозорининг марказига чиқмоқда
Мазкур тадбирда Президент администрацияси раҳбари Саида Мирзиёева иштирок этиши кутилмоқда.
Бугун, 18 май куни илк бор Ўзбекистоннинг энг йирик давлат активлари Лондон фонд биржасида глобал инвесторлар савдосига чиқади. Мазкур тадбирда Президент администрацияси раҳбари Саида Мирзиёева иштирок этиши кутилмоқда.
Жамғарманинг Лондон биржасига чиқиши Ўзбекистон Президенти Шавкат Мирзиёевнинг юртимиздаги кенг кўламли иқтисодий ислоҳотлар, очиқлик ва шаффофлик тамойилларини кенгайтириш ҳамда инвестициявий муҳитни янада яхшилаш борасидаги саъй-ҳаракатларининг амалий ифодасидир.
Энергетика, авиация, телекоммуникация, транспорт ва банк тизимидаги стратегик компанияларни жамлаган Ўзбекистон Миллий инвестиция жамғармаси (UzNIF) орқали мамлакат жаҳон капитал бозорининг марказига кириб бормоқда.
Бугундан бошлаб халқаро капитал бозорида Ўзбекистон активларининг стратегик ва фаол савдолари бошланади. Биз нафақат йирик молиявий жараённинг, балки миллий иқтисодиётимиз глобал молия тизими билан узвий интеграциялашаётган тарихий куннинг гувоҳи бўлмоқдамиз.
