Афғон қозонларига яширилган 190 кг наркотик фош этилди

Қозонлар ичига яширилган наркотик моддалар фош қилинди.

Давлат хавфсизлик хизматининг Сурхондарё вилояти бўйича бошқармаси ва Чегара қўшинлари ҳамда Божхона органлари ходимлари ҳамкорлигида тезкор-қидирув тадбирлари ўтказилган. Унда йирик миқдордаги наркотик моддалар тўхтатиб қолинди.

Хусусан, Афғонистондан “Термиз автойўл” халқаро ўтказиш пункти орқали кириб келган, олдиндан кузатувга олинган Денов шаҳрида яшовчи, 1990 й.т. фуқаро бошқарувидаги “Hyundai” русумли юк автомашинаси чуқурлаштирилган тартибда текширувдан ўтказилди.

Натижада, унинг юкхонасида бўлган жами 750 дона афғон қозонларининг 210 донаси ичига хуфиёна тарзда яширилган, умумий тахминий оғирлиги 190 кг 800 граммни ташкил этувчи “гашиш” моддаси борлиги аниқланди.

Маълум бўлишича, ушбу афғон қозонлари ишлаб чиқарувчи томонидан Марказий Осиё республикаларидан биридаги хўжалик юритувчи субъект номига юборилаётган бўлган.

Ҳозирда ҳолат юзасидан суриштирув ҳаракатлари олиб борилмоқда.

Давлат хавфсизлик хизмати ва Божхона идоралари ҳамкорлигида ўтказилган тезкор тадбирда Тошкент вилоятининг Тошкент туманида истиқомат қилувчи, 1991 й.т. шахс ўз яшаш хонадонида хориждан айланма йўллар орқали олиб келинган дори воситаларини сақлаб, пойтахтдаги дорихоналарга сотиш билан шуғулланиб келганлиги аниқланди.

Омборни кўздан кечириш давомида жами 119 турдаги, 3356 қутида бўлган 76318 дона “Frotu”, “Budenofalk”, “Gaviscon”, “Baraclude” ва бошқа номдаги дори воситалари аниқланиб, процессуал тартибда расмийлаштириб олинди. Уларнинг дастлабки умумий қиймати тахминан 1 млрд сўмни ташкил этади.

Ҳозирда дори воситаларидан намуналар олиниб, экспертиза ўтказиш учун Фармацевтика маҳсулотлари хавфсизлиги марказига юборилди.

Ҳолат юзасидан терговга қадар текширув ҳаракатлари давом этмоқда