АҚШ армияси штаб бошлиғи истеъфога чиқарилди
Уруш вазири Хегсет мазкур ташаббус билан чиққан. Ушбу қарорга охири кўринмаётган Эрон уруши сабаб бўлиши мумкин.
АҚШ армияси штаб бошлиғи генерал Ренди Жоржнинг истеъфога чиқди. Пентагон бу маълумотни тасдиқлади.
"Генерал Ренди Жорж армиянинг 41-штаб бошлиғи сифатида нафақага чиқмоқда, қарор дарҳол кучга киради. Ҳарбий департаменти генерал Жоржга мамлакатимизга қилган хизмати учун миннатдор", дейилади Х ижтимоий медиа платформасида департамент вакили Шон Парнелл томонидан эълон қилинган баёнотда.
Мудофаа вазирлиги шунингдек, генералнинг кетиши ҳақидаги аввалги ОАВ хабарларини тасдиқлаб, Жоржга "нафақада энг яхши тилакларни" тилади.
Аввалроқ CBS News манбаларга таяниб, Пентагон бошлиғи Пит Хегсет Жоржнинг зудлик билан истеъфога чиқишини талаб қилганини хабар қилган эди.
Канал манбаларидан бирининг сўзларига кўра, АҚШ мудофаа вазири "бу лавозимда Трамп ва унинг армия ҳақидаги тасаввурларини амалга оширадиган одамни хоҳлайди".
Жорж 2023 йил августидан бери АҚШ армияси штаб бошлиғи лавозимида ишлаб келмоқда. У 61 ёшда.
Жо Байден маъмурияти даврида генерал Жорж 2021 йилдан 2022 йилгача Мудофаа вазири Ллойд Остиннинг катта ҳарбий ёрдамчиси бўлиб ишлаган. Каналга кўра, профессионал пиёда офицери ва Вест-Пойнт битирувчиси бўлган Жорж биринчи Форс кўрфази урушида, шунингдек, кейинчалик Ироқ ва Афғонистондаги можароларда хизмат қилган.
Армия штаб бошлиғи одатда бу лавозимни тўрт йил давомида эгаллаб туради. Жорж бу лавозимга Президент Жо Байден томонидан номзод қилиб кўрсатилган ва 2023 йилда Сенат томонидан тасдиқланган. У 2027 йилгача хизмат қилиши мумкин эди.
CBS News хабарига кўра, Жоржнинг ўрнини илгари Хегсетнинг ҳарбий ёрдамчиси бўлиб ишлаган Армия штаб бошлиғининг ҳозирги ўринбосари генерал Кристофер ЛаНив эгаллайди. 2022 йилдан 2023 йилгача ЛаНив Армиянинг 82-ҳаво-десант дивизияси қўмондони генерал бўлиб ишлаган.
