Тошкент ва Атирау ўртасида янги рейс йўлга қўйилади

29 мартдан бошлаб "Ўзбекистон ҳаво йўллари" авиакомпанияси Тошкент ва Қозоғистоннинг Атирау шаҳри ўртасида янги рейсни ишга туширади.

Бу ҳақда Қозоғистон транспорт вазирлиги маълум қилди.

Парвозлар ҳафтасига икки марта, душанба ва жума кунлари Airbus А320 самолётларида амалга оширилади.

Вазирлик янги йўналишнинг ишга туширилиши Қозоғистон ва Ўзбекистон авиация маъмуриятлари ўртасида 2025 йил август ойида эришилган келишувлар натижаси эканлигини таъкидлади. Вазирлик маълумотларига кўра, халқаро йўналишларни кенгайтириш ва парвозлар частотасини ошириш устувор вазифа бўлиб қолмоқда.

Янги рейс хизматини ишга тушириш икки мамлакат ўртасидаги бизнес алоқалари, савдо ва туризмни ривожлантиришга ёрдам бериши кутилмоқда.