Картошка орасига яширилган 72 кг наркотик фош этилди
Ушбу катта миқдордаги гиёҳвандлик воситалари Россияга олиб кетилаётган бўлган.
Картошка кўринишида ниқобланган 72 кг наркотик модда фош қилинди.
Сурхондарё вилоятининг Термиз туманида яшовчи, 2001 й.т. фуқаро бошқарувидаги “MAN” русумли юк автотранспорт воситаси Афғонистондан “Термиз-автомобил йўли” халқаро ўтказиш пунктига кириб келган вақтда ДХХнинг Чегара қўшинлари ва Божхона идоралари ходимлари ҳамкорлигида белгиланган тартибда кўрикдан ўтказилди.
Натижада, автомашина юкхонасида картошка маҳсулотлари борлиги маълум бўлди. Ушбу қишлоқ хўжалиги маҳсулотлари синчковлик билан текширилганда эса, уларнинг орасига худди картошка кўринишида ясалган 222 дона бўлакдан иборат, жами 72 кг 300 гр “гашиш” моддаси яширилганлиги аниқланиб, процессуал тартибда расмийлаштириб олинди.
Дастлабки маълумотларга кўра, ушбу катта миқдордаги гиёҳвандлик воситалари Россия Федерациясига олиб кетилаётган бўлган.
Ҳозирда ҳолат юзасидан суриштирув ишлари олиб борилмоқда.
