Францияда НАТОни тарк этишга чақирувчи резолюция тақдим этилди
Бунга АҚШнинг суверен давлатларга қарши даъволари, Европа Иттифоқига санкциялар босими ва бошқалар сабаб бўлган.
Франция парламентида Қўшма Штатлар билан келишмовчиликлар туфайли мамлакатнинг НАТОдан чиқишига чақирувчи резолюция тақдим этилди.
Ҳужжат Миллий Ассамблея вице-президенти ва La France Insoumise чап қанот партиясидан парламент аъзоси Клеменс Гетте томонидан тайёрланган.
Гетте хоним Berliner Zeuiting газетасига берган интервьюсида айтганидек, Қўшма Штатлар "кечирилмайдиган империал сиёсат"ни олиб бораётгани Европа Иттифоқини вассал мақомига туширди. Унинг таъкидлашича, Вашингтон бошчилигидаги бундай сиёсат Франциянинг уларнинг раҳбарлигидаги иттифоқда қолишини имконсиз қилади.
Гетте Венесуэла президентининг ўғирланиши, суверен давлатларга қарши таҳдидлар, Европа Иттифоқига санкциялар босими ва НАТО иттифоқчиларининг Америка мудофаа саноатига фойда келтириш учун ҳарбий харажатларни кўпайтириш талабларини тилга олди.
Сиёсатчининг фикрича, блокдан чиқиш Францияга ўзининг ҳарбий ва дипломатик мустақиллигини тиклашга имкон беради. Унинг таъкидлашича, мамлакат ўзини яккаланиб қолмайди, балки кўп томонлама форматлар, экологик кун тартибини илгари суриш, қуролсизланиш ва жамоат товарларини ҳимоя қилиш орқали ўз таъсирини кучайтиради.