Фарғонада автомобил бакидан 11 кгдан ошиқ наркотик топилди
Бундан ташқари 6945 дона кучли таъсир қилувчи дори воситалари ҳам яширилган.
Автомашина ёқилғи баки ичига яширилган наркотик моддалар фош бўлди.
Фарғона вилоятининг Бешариқ туманида жойлашган “Равот” чегара-божхона постида текширув ўтказилди. Унда Тожикистон Республикасидан кириб келган, Ўзбекистон туманида яшовчи, 1979 й.т. фуқаро бошқарувидаги “Ласетти” русумли автотранспорт воситаси Давлат хавфсизлик хизматининг Чегара қўшинлари ҳарбий хизматчилари ва Фарғона вилояти бўйича бошқармаси ходимлари ҳамда Божхона органлари ходимлари ҳамкорлигида ўрганилган.
Натижада, автомашинанинг ёқилғи баки ичига соф оғирлиги 10 кг. 739 гр. “гашиш”, 412 гр. “марихуана” ва 35 гр. “опий” гиёҳвандлик воситалари ҳамда 6945 дона “Royal” кучли таъсир қилувчи дори воситалари яширилганлиги аниқланиб, тегишли тартибда расмийлаштириб олинди.
Ҳозирда ҳолат юзасидан мазкур шахсга нисбатан Жиноят Кодексининг 246-моддаси 2-қисми ва 25,273-моддаси 5-қисми билан жиноят иши қўзғатилиб, “қамоқ” эҳтиёт чораси қўлланилди.
Тергов доирасида унинг жиноий алоқаларини аниқлаш бўйича зарур чора-тадбирлар амалга оширилмоқда.
Аввалроқ Тошкентда ҳокимият мутахассиси пора билан ушланганди.
У Учтепа тумани ҳудудида бузилиши лозим бўлган савдо дўконлари ва бошқа манзиллар рўйхати тузилаётганлигини рўкач қилиб, тадбиркордан пул олган.