Машиналарга экостикерларни бериш тартиби белгиланди

28 ноябрдаги ҳукумат қарори билан “Автотранспорт воситаларидан чиқариладиган ифлослантирувчи моддалар ташламаларининг атмосфера ҳавосига зарарли таъсири бўйича йўл қўйиладиган нормативларга мослиги даражасини аниқлаш, уларни экологик тоифаларга ажратиш ҳамда экологик стикерларни бериш тартиби тўғрисида”ги низом тасдиқланди.

Низомга кўра, транспорт воситасининг экологик тоифаси унинг ишлаб чиқарувчи томонидан тасдиқланган экологик синфига мувофиқ белгиланади.

Бунда транспорт воситалари мезонларга кўра экологик тоифаларга ажратилади.

1. Бензин, сиқилган ва суюлтирилган газ ёқилғиси билан ҳаракатланувчи:

• “Евро-2” ва ундан юқори экологик синфига кирувчи транспорт воситалари – “тоза” экологик тоифага;
• “Евро-0” ва “Евро-1” экологик синфига кирувчи транспорт воситалари – “ўрта” экологик тоифага;

2. Дизел ёқилғи тури билан ҳаракатланувчи:

• “Евро-4” ва ундан юқори экологик синфига кирувчи транспорт воситалари – “тоза” экологик тоифага;
• “Евро-3” экологик синфига кирувчи транспорт воситалари – “ўрта” экологик тоифага;
• “Евро-0”, “Евро-1” ва “Евро-2” экологик синфига кирувчи транспорт воситалари – “зарарли” экологик тоифага;

3. Гибрид автомобиллар, муқобил ёқилғи турларида ҳаракатланувчи транспорт воситалари ҳамда ишлаб чиқарилганига 3 йилдан ошмаган транспорт воситалари – “тоза” экологик тоифага.

Транспорт воситаларини рўйхатга олиш ва қайта рўйхатга олиш жараёнида уларнинг тоифаларига мос равишда “яшил”, “сариқ” ёки “қизил” рангли экологик стикерлар Давлат йўл ҳаракати хавфсизлиги бўлинмаларида экологик операторлар томонидан берилади.

Транспорт эгаси ихтиёрий равишда экологик стикер олиш учун Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизматига унинг расмий веб-сайти ёки ЯИДХП (my.gov.uz) орқали мурожаат қилади.

Экологик стикерлар муддатсиз даврга берилади.

Эслатиб ўтиш керак, дастлаб экостикерларни жорий этиш 2024 йил 1 июнидан бошланиши керак эди, бироқ кейинроқ ҳукумат бу жараённи 2025 йил 1 мартга кўчирганди. Сўнг яна қолдирилиб, 2026 йил январдан белгиланган.

Биринчи босқичда (2025 — 2027 йилларда) — Тошкент шаҳрида, иккинчи босқичда (2028 — 2030 йилларда) — Нукус шаҳри ва вилоятлар марказларида ҳамда, заруратга кўра, алоҳида экологик зоналарда (сайёҳлик маркази, табиат қўриқхонаси, соғломлаштириш ҳамда дам олиш масканлари ва бошқалар), учинчи босқичда (2031 — 2034 йилларда) бошқа барча ҳудудларда ишга туширилиши режалаштирилган.