Тунги клуб олдида жанжал кўтарган шахс 8 йилдан ошиққа қамалди
У рақибига кучли зарба бериб, комага тушириб қўйганди. Тақиқланган жазони умумий тартибли колонияларда ўташ белгиланди.
Бугун жиноят ишлари бўйича Мирзо Улуғбек туман судида А. Ш. (1995 йилда Тошкент шаҳрида туғилган)га оид жиноят ишини биринчи инстанцияда кўриб чиқиш бўйича суд жараёни якунланди.
Суднинг ҳукмига кўра А. Ш. Жиноят кодексининг 104-моддаси (қасддан баданга оғир шикаст етказиш) 2-қисми “е” банди, 168-моддаси (фирибгарлик) 4-қисми “а” банди ва 277-моддаси (безорилик) 3-қисми “г” бандида назарда тутилган жиноятларни содир этганликда айбли деб топилди.
А. Ш.га Жиноят кодексининг 59-моддаси (бир неча жиноят содир этганлик учун жазо тайинлаш) тартибида 8 йил 1 ой муддатга озодликдан маҳрум қилиш жазоси тайинланди.
Тайинланган жазони умумий тартибли колонияларда ўташ белгиланди.
Жиноят ишлари бўйича Мирзо Улуғбек туман судининг ушбу ҳукми устидан тарафлар қонунда белгиланган тартиб ва муддатда Тошкент шаҳар судининг жиноят ишлари бўйича судлов ҳайъатига апелляция/кассация тартибида шикоят бериш ва протест келтиришга ҳақлилиги маълум қилинади.
Эслатиб ўтамиз, шу йил март ойида 30 ёшли А.Шукуров танишини ҳимоя қилишга уринган шахсга кучли зарба бериб, комага тушириб қўйганди.
Воқеа жойидан қочиб яширинган зўравон кўп ўтмай Қозоғистонда қўлга олинганди.