Ўтган йили 900 минг иш ўрни ҳисоботга қўшиб ёзилгани аниқланди
12 млрд сўмлик иш ҳақи талон-торож қилинган, дейди Бош прокурор Ниғматилла Йўлдошев.
2024 йилда ҳисоботларда ҳақиқатда мавжуд бўлмаган 900 мингга яқин иш ўрни киритилган. Бу ҳақда Бош прокурор Ниғматилла Йўлдошев маълумот берди.
Бош прокурор 5 сентябр куни Сенат мажлисида мамлакатда камбағалликни қисқартириш борасида амалга оширилган ишларини муҳокама қилар экан, бир қатор жиддий камчиликларни таъкидлади.
Қайд этилишича, 2024 йилда ҳисоботларда ҳақиқатда мавжуд бўлмаган 900 мингга яқин иш ўрни киритилган, 78 та ҳолатда 12 млрд сўмлик иш ҳақи талон-торож қилинган. Шу билан бирга, фуқароларга тўланмай қолган 11 млрд сўм миқдоридаги иш ҳақлари ундириб берилди.
Шунингдек, прокуратура органлари ўтган йили 29 мингдан ортиқ тадбиркор ва инвесторларнинг муаммоларини ҳал қилишда амалий ёрдам кўрсатди. Натижада 7 мингдан ортиқ янги корхона ташкил этилиб, 22 мингга яқин янги иш ўринлари яратилган.
Яширин иқтисодиётга қарши курашиш жараёнида эса 3 трлн 449 млрд сўмлик солиқларни тўлашдан бўйин товлаш ҳолатлари фош этилди. Бундан ташқари, йирик солиқ тўловчилар бўйича назорат механизмларидаги камчиликлар бартараф этилиб, давлат бюджетига қўшимча 200 млрд сўмдан ортиқ маблағ тушиши таъминланди.
Аввалроқ ДХХ Қурилиш бошқармаси юристконсулти ва солиқ инспекторини қўлга олганди.
Фарғонада эса “Кичик саноат зоналарини бошқариш дирекцияси" мутахассиси 15 минг доллар олаётганда ушланган.