"Бойсункўмир"ни хусусийлаштириш жараёни бошланди
Халқаро санкцияларга дучор бўлган давлат корхонаси ёки фирма савдоларга қўйилмайди.
"Бойсункўмир" компаниясини хусусийлаштириш жараёни бошланди.
Давлат активларини бошқариш агентлиги "Бойсункўмир" компаниясининг 100 фоиз улушини хусусийлаштириш бошланганини маълум қилди.
Тошкентдаги Alkes Research компанияси активни сотиш бўйича маслаҳатчи вазифасини бажаради.
Хусусийлаштиришнинг биринчи босқичи потенциал харидорларнинг аризаларини тўплашни ўз ичига олади. Ушбу босқичнинг бир қисми сифатида ариза берувчилар маслаҳатчига рўйхатга олиш, акциядорлар тўғрисидаги маълумотларни ва охирги уч йил учун молиявий ҳисоботларни тақдим этишлари керак.
Халқаро санкцияларга дучор бўлган давлат корхонаси ёки фирма "Бойсункўмир"нинг харидори бўла олмайди.
Электрон почта орқали аризаларни тўплаш 20 сентябргача давом этади.
Кейинги босқичда потенциал харидорлар маълумотларни ошкор этмаслик тўғрисидаги шартномани имзолайди ва компаниянинг батафсил молиявий ҳисоботлари билан танишиш имкониятига эга бўлади. Улар гаровга қўйиш ва ўз нархини таклиф қилишлари мумкин бўлади.
Компания ҳақида
" Бойсункўмир" айни дамда Сурхондарё вилоятидаги Бойсун кўмир конини ўзлаштирмоқда. Компания 2055 йилгача кўмир қазиб олиш ҳуқуқига эга.