Тожикистондан олиб келинган қарийб 50 кг гиёҳвандлик моддаси қўлга олинди
Ушбу юкни Хоразм вилоятида пулламоқчи бўлган шахс Қорақалпоғистоннинг Тўрткўл туманида ашёвий далиллар билан ушланган.
Тожикистондан олиб келинган қарийб 50 кг “опий” гиёҳвандлик воситаси мусодара қилинди.
Давлат хавфсизлик хизматининг Хоразм вилояти бўйича бошқармаси ходимлари томонидан тезкор тадбир ўтказилган.
Унда Сурхондарё вилоятининг Шеробод туманида яшовчи, 1990 й.т. фуқаро 49 кг 599 гр “опий” моддасини ўзининг бошқарувида бўлган DAF русумли юк автомашинасининг юкхонасидаги хуфиёна жойга яширган ҳолда Қорақалпоғистон Республикасининг Тўрткўл туманига олиб келган вақтида ашёвий далиллар ушланди.
Терговга қадар текширув давомида Тожикистон Республикасидан контрабанда йўли билан олиб келинган мазкур гиёҳвандлик воситаси келгусида Хоразм вилояти ҳудудида сотилиши режалаштирилганлиги маълум бўлди.
Ҳолат юзасидан мазкур шахсга нисбатан Жиноят Кодексининг 28,246-моддасининг 2-қисми ва 273-моддасининг 5-қисми билан жиноят иши қўзғатилиб, қамоқ эҳтиёт чораси қўлланилди.
Шунингдек, тергов ҳаракатлари доирасида унинг жиноий шерикларини аниқлаш бўйича ҳам зарур чора-тадбирлар амалга оширилмоқда.