Сергели туманида омборхона ёниб кетди
Ёнғин деярли 2,5 соатда ўчирилган. Жараёнга Фавқулодда вазиятлар вазири Ботир Қудратхўжаев бошчилик қилган.
Тошкент шаҳри Сергели туманида омборхона ёнди. Ёнғин деярли 2,5 соатда ўчирилди.
Сергели тумани Нилуфар кўчасида жойлашган омборхонада ёнғин содир бўлаётгани ҳақида шаҳар ФВБга мурожаат келиб тушган.
Хабарга асосан, соат 11:05 да 12 та экипаж ёнғин жойига етиб борган ва бартараф этиш ишларига киришган. Ёнғин соат 12:15 да қуршаб олинди ва соат 13:31 да батамом ўчирилди. Ушбу ёнғинни бартараф этиш ишлари Фавқулодда вазиятлар вазири Ботир Қудратхўжаев ва вазирнинг биринчи ўринбосари С. Зупаровлар бошчилигида амалга оширилди.
Тан жароҳати олганлар тўғрисида маълумот келиб тушмади.
Ёнғинни келтириб чиқарган сабаблар ҳамда етказилган зарар миқдори аниқланмоқда.