“Tanzilandiya” xususiy bogʻchasining litsenziyasi bekor qilindi
Bogʻchaning Toshkent shahar sudiga yoʻllagan apellyatsiya shikoyati qanoatlantirilmagan.
Toshkentdagi Tanzilandiya xususiy bogʻchasining litsenziyasi bekor qilindi.
Joriy yilning 14 fevral kuni Maktabgacha va maktab taʼlimi vazirligi xodimlari tomonidan Toshkent shahri, Mirzo Ulugʻbek tumani, Kichik avtomobil halqa yoʻli va Buyuk ipak yoʻli yoʻli koʻchalari kesishmasida joylashgan “YUKSALISH CONSTRUCTION” (Tanzilandiya) nodavlat maktabgacha taʼlim tashkilotida oʻrganish oʻtkazilgan.
Oʻtkazilgan oʻrganish natijasida aniqlangan qoʻpol kamchiliklar asosida “YUKSALISH CONSTRUCTION” xususiy bogʻchasining litsenziyasini bekor qilish boʻyicha Toshkent tumanlararo iqtisodiy sudiga ariza kiritildi.
Joriy yilning 19 mart kuni sudning hal qiluv qarori bilan “YUKSALISH CONSTRUCTION” xususiy bogʻchasi 2019 yil 27 dekabr kunidagi MT-1104-son litsenziyasi bekor qilindi.
Sudning qaroridan norozi boʻlib, javobgar “YUKSALISH CONSTRUCTION” xususiy bogʻchasi iqtisodiy ishlar boʻyicha Toshkent shahar sudiga apellyatsiya shikoyati kiritgan.
Joriy yilning 23 aprel kuni Toshkent shahar sudida sudya Usmanov Anvar Akramovich raisligida mazkur ish koʻrib chiqildi. Sud hayʼati tomonidan javobgar “YUKSALISH CONSTRUCTION” ning apellyatsiya shikoyati qanoatlantirishni rad etdi va birinchi instansiya hal qiluv qarorini oʻz kuchida qoldirdi.
Eslatib oʻtamiz, 2025 yil fevral oyida ushbu bogʻchada bolalar kaltaklangani haqida xabarlar tarqalgandi. Hodisa yuzasidan IIB tergovga qadar tekshiruv oʻtkazgan.