Самарқандда ичимлик ва оқова сув нархлари яна оширилади
Янги тарифлар охирги марта 2023 йил ноябрда тасдиқланган эди.
Халқ депутатлари Самарқанд вилояти кенгашининг бугунги қарори билан 1 апрелдан вилоятда ичимлик ва оқова сув нархлари оширилади.
Бу вилоятда янги тарифлар охирги марта бундан салкам 1,5 йил аввал белгиланганди. Ўшанда белгиланган 2500 сўм нарх энди 2800 сўм бўлади.
Қарорда нархлар 1 апрелдан кучга кириши белгиланган. Аммо Вазирлар Маҳкамасининг 2024 йил 15 июлдаги 194-сонли қарорига кўра, тарифлардаги ўзгаришлар тўғрисида улар амалга киритилишидан 15 кун олдин оммавий ахборот воситалари орқали хабардор қилиниши керак.
Эслатиб ўтиш керак, "Ўзсувтаъминот" АЖ бошқаруви раиси ўринбосари Хуршид Раҳматуллаев сув нархларини республикада ягона тарифга тўғрилаш хусусида иш олиб борилаётганини айтган.
