Маиший техника пулларини ўзлаштирган менежер ва кассир жазоланди
Улар судда ўз айбига тўлиқ иқрорлик билдирган.
2025 йил 27 феврал куни жиноят ишлари бўйича Бешариқ тумани судида маиший техника пулларини ўзлаштирган шахсларга ҳукм ўқилди. Суд ҳукми нусхаси Platina.uz ихтиёрида мавжуд.
Маълум бўлишича, А.А. 2024 йил 16 январ кунидан “Texnomart” МЧЖнинг Бешариқ филиали менежери лавозимида ишлаб келган. У кассир У.Т. билан олдиндан тил бириктириб, бир гуруҳ бўлгани ҳолда 2024 йил январь ойи охиридан 2024 йил июнь ойи охирига қадар хизмат мавқеидан фойдаланган ҳолда филиал томонидан ўзига ишониб топширилган ва ихтиёрида бўлган анча миқдордаги 63.334.215 сўмлик, жами 15 турдаги маиший техника ва бошқа электротехника товарларни бошқа шахсларга сотган.
Сўнгра пулларни шахсий эҳтиёжлари йўлида сарфлаб, ўзганинг анча миқдордаги мулкиларини ўзлаштириш йўли билан талон-тарож қилган.
Ҳар иккала судланувчи содир этган жиноий қилмишидан чин кўнгилдан пушаймон бўлиб, жиноят натижасида етказилган зарарлар тўлиқ қопланганини, шахсини, муқаддам судланмаганини айтиб, қонуний енгиллик беришни сўради.
ЖКнинг 167-моддаси 5-қисмида “етказилган моддий зарарнинг ўрни қопланган тақдирда озодликни чеклаш ёки озодликдан маҳрум қилиш тариқасидаги жазо қўлланилмайди” деб кўрсатилган.
Якуний суд ҳукмига кўра, ҳар иккала судланувчига базавий ҳисоблаш миқдорининг 30 баравари миқдорида (10.200.000 сўм) жарима жазоси тайинланди.
Суд иши Олий суд порталидан олинди.
