Самарқандда ҳоким ёрдамчиси ва унинг жиноий шериги судга тортилди

2025 йил 14 март куни жиноят ишлари бўйича Оқдарё туман судининг очиқ суд мажлисида ҳоким ёрдамчиси ва унинг шерикларига нисбатан ҳукм ўқилди. Суд ҳукми Platina.uz ихтиёрида мавжуд.

Маълум бўлишича, Х.А. Оқдарё тумани “Истиқлол” маҳалласи ҳоким ёрдамчиси лавозимида ишлаб келиб, “Hashamatli uy” МЧЖ раҳбари Ж.Н. ва фуқаро М.А. билан олдиндан ўзаро жиноий тил бириктирган. У банкдан иссиқхона қуриш учун 30.000.000 сўм миқдорида кредит маблағлари ажратилишига эришган, ушбу кредит маблағлари банк томонидан таъминотчи тариқасида “Hashamatli uy” МЧЖ ҳисоб рақамига ўтказиб берилган бўлсада, жамият томонидан иссиқхона қуриб берилмасдан, кредит шартномасида кўрсатилган хизматлар ҳақиқатда бажарилмаган бўлсада, сохта маълумотларни қасддан киритган. Ушбу ҳисоб-фактурани сохта эканлигини билгани ҳолда ундан фойдаланиб “А” банк Лойиш филиалига тақдим этиб, бюджет ҳисобидан молиялаштирилган 30.000.000 сўм кредит маблағларини растрата қилиш йўли билан талон-торож қилган.

Х.А. жиноий ҳатти-ҳаракатларини давом эттириб, тадбиркор Д.Н билан тил бириктириб, ем етказиб бериш учун 8.000.000 сўм ва балиқчилик ҳовузи қуриш учун 27.000.000 сўм жами 33.000.000 сўм миқдорида кредит маблағлари ажратишга эришган ва пулларни талон-торож қилган. Ҳоким ёрдамчиси яна икки ҳолатда 33 млн сўмлик кредит маблағларини ўзлаштириб юборган.

Шу тариқа судланувчи Х.А. бир гуруҳ шахслар билан олдиндан тил бириктириб, такроран ўзига ишониб топширилган ўзганинг мулкини растрата қилиш йўли билан талон-торож қилиб, ЖК 167-моддаси 2-қисмининг “б,в” бандларида кўрсатилган жиноятни содир қилган.

Судда сўроқ қилинган судланувчилар Х.А ва тадбиркор Н. Д.лар ўз айбига қисман иқрорлик билдирдилар.

Якуний суд ҳукмига кўра, Х.А.га жазоларни қисман қўшиш йўли билан, узил-кесил 1 йил муддатга давлат иштирокидаги ташкилотларда мансабдорлик ва моддий жавобгарлик юклатилган лавозимларда ҳамда ҳоким ёрдамчиси вазифасида ишлаш ҳуқуқидан маҳрум қилиниб, ҳар ойлик иш ҳақининг 20 фоизини давлат даромади ҳисобига ушлаб қолган ҳолда 1 йил 1 ой муддатга ахлоқ тузатиш ишлари жазоси тайинланди.

Н. Д.га эса узил-кесил 2 йил 3 ой муддатга давлат иштирокидаги ташкилотларда мансабдорлик ва моддий жавобгарлик юклатилган лавозимларда ишлаш ҳуқуқидан маҳрум қилиниб, ҳар ойлик иш ҳақининг 20 фоизи миқдорини давлат даромади ҳисобига ушлаб қолган ҳолда 2 йил 8 ой муддатга ахлоқ тузатиш ишлари жазоси тайинланди. Кредит қарздорликлари тўлиқ сўндирилган.

Суд иши Олий суд порталидан олинди.