Самарқандда турли харажатлар учун 35 млрд сўмга яқин маблағ ажратилмоқда

Халқ депутатлари Самарқанд вилояти кенгаши маблағ ажратиш бўйича икки қарорни имзолади. Ҳар иккала қарор 17 март куни имзоланган.

Жумладан, вилоят маҳаллий бюджетининг 2025 йил 1 январ ҳолатига шаклланган эркин қолдиқ маблағлари ҳисобидан Самарқанднинг қадимий тарихий илдизларини ўрганиш ва “Афросиёб” ёдгорлигида, Амир Темур аркида фанлараро тадқиқод усулларини қўллаш орқали комплекс қазув ишларини амалга ошириш билан боғлиқ харажатлар учун бир миллиард бир юз етмиш миллион сўм маблағ ажратилади.

Иккинчи қарорга кўра эса вилоят маҳаллий бюджетининг 2025 йил 1 январь ҳолатига шаклланган эркин қолдиқ маблағлари ҳисобидан иловага мувофиқ тадбирларни амалга ошириш учун ўттиз уч миллиард беш юз уч миллион юз минг млн сўм маблағ ажратилиши белгиланган.

Жумладан, Мустақилликнинг 34 йиллиги муносабати билан Самарқанд тўғрисида видеолавҳа тайёрлаш учун 4,4 млрд сўм берилади.Эҳтиёжманд оилалар хотин-қизларининг контракт пулларини қоплаш учун 586 млн сўм, мактабларни хорижий тилларни ўрганиш учун адабиёт ва бошқа қурилмалар билан таъминлаш учун 1 млрд сўм тақдим этилади.

Ургутдаги ҳарбий қисм учун турар жой биносини қуриш учун 4,7 млрд сўм, Самарқанд шаҳридаги "Динамо" шаҳри стадионининг ўриндиқларини алмаштириш ва бошқа харажатлар учун 2 млрд сўм, Булунғур туманидаги 5-умумтаълим мактабини таъмирлаш учун 4,3 млрд сўм берилади.

Туман (шаҳар) тиббиёт бирлашмалари учун зарур компютер жиҳозларини сотиб олиш учун 5,1 млрд сўм берилиши кўзда тутилган.

Аввалроқ Хоразмда бюджетдан 44 млрд сўмдан ошиқ пул ажратилганди.