Йирик ташкилотларнинг хорижий автомобиллари сотувга қўйилмоқда
Президент администрацияси транспорт қисми балансида бўлган CADILLAC, “Агроинспекция” балансидаги Toyota Land Cruiser автомобили аукционга чиқарилган.
Ўзбекистонда йирик давлат ташкилотларининг хорижий автомобиллари аукционда сотила бошлади.
Масалан, E-auksion орқали Президент администрацияси транспорт қисми балансида бўлган CADILLAC автомобили 246 млн сўм бошланғич нарх билан савдога чиқарилган. Савдо 2025 йил 25 март куни ўтказилади.
Ўзбекистон Президенти администрацияси Транспорт қисми савдога қўйилаётган автотранспорт воситаларига нисбатан тақиқ ва жарималар йўқлигини билдирувчи кафолат хатини имзолаган.
CADILLAC автомобили билан бирга бошқа воситалар, жумладан Mercedez Benz 350 S W221 ҳам сотувга қўйилган. Унинг қайта белгиланган нархи 245 млн сўмни ташкил этади.
“Агроинспекция” балансидаги Toyota Land Cruiser автомобили қарийб 471 млн сўм бошланғич нарх билан савдога чиқарилган.
Ташкилот масъуллари чиндан ҳам мазкур автомобил сотилаётганини тасдиқлаган, истаган одам уни сотиб олиши мумкин. Савдо 14 апрел куни ўтказилиши белгиланган.
Эслатиб ўтамиз, аввалроқ бош вазир Абдулла Арипов давлат раҳбари топшириғидан кейин Malibu автомобилидан фойдаланаётгани маълум бўлганди.
