Қурилишнинг 3-қаватига автомобил олиб чиқишга рухсат берганлар жазоланди
Ўрганишлар давомида аниқланишича, қурилиш объектидан хонадон сотиб олган фуқаро ўзига тегишли "Нексия-2" русумли автомобилни қурилаётган бинонинг учинчи қаватига кран ёрдамида олиб чиқиб жойлаштирган. Мазкур ҳаракат қурилиш объекти учун масъул шахслар билан келишилган ҳолда амалга оширилган.
Ижтимоий тармоқларда Қашқадарё вилояти Шаҳрисабз шаҳридаги "Ғалаба" маҳалласи ҳудудида қурилаётган кўп қаватли турар жой биносининг учинчи қаватига автомобил олиб чиқилгани акс этган видеолавҳа тарқалди.
Мазкур ҳолат Қашқадарё вилояти Қурилиш ва уй-жой коммунал хўжалиги соҳасида ҳудудий назорат инспекцияси томонидан ўрганилди.
Ўрганишлар давомида аниқланишича, қурилиш объектидан хонадон сотиб олган фуқаро ўзига тегишли "Нексия-2" русумли автомобилни қурилаётган бинонинг учинчи қаватига кран ёрдамида олиб чиқиб жойлаштирган. Мазкур ҳаракат қурилиш объекти учун масъул шахслар билан келишилган ҳолда амалга оширилган.
Қурилиши тугалланмаган бинонинг юқори қаватига автомобиль олиб чиқиш бинонинг юк кўтарувчи конструкцияларига ортиқча юк тушириши, шунингдек, қурилиш майдонидаги ишчилар ва бошқа шахслар ҳаёти ҳамда соғлиғига жиддий хавф туғдириши мумкин.
Ҳолат юзасидан қурилиш объекти учун масъул шахсларга хавфсизлик техникаси талабларига риоя этмаганлиги учун амалдаги қонунчиликка мувофиқ маъмурий жарималар қўлланилди, дейилади хабарда.
