Тошкентда озиқ-овқат нархи умумий ҳолатда пастлади
Ўзимизникидан қарийб 2 баравар арзон Покистон картошкаси импорти ҳисобига бу маҳсулот нархи сезиларли камайган.
Вазирлар Маҳкамаси ҳузуридаги Макроиқтисодий ва ҳудудий тадқиқотлар институти (МҲТИ) мутахассислари 2025 йилнинг 13 март ҳолатига Тошкент шаҳридаги йирик супермаркетларда 21 номдаги озиқ-овқат маҳсулотлари нархининг ўзгаришини кўриб чиқди.
Мониторинг натижалари 6 номдаги маҳсулот бўйича минимал нархлар ўтган ойдагига нисбатан пасайганлигини кўрсатди.
Хусусан, картошканинг минимал нархи 19,8 фоиз, сариқ пиёзники 10,3 фоиз, қизил сабзиники 3,4 фоиз, тухумники 2,1 фоиз, бананники 0,9 фоиз, кунгабоқар ёғиники 0,6 фоиз пасайган.
Картошка нархи пасайишига сабаб Покистондан келаётган картошка сабаблидир. Ўзимизда етиштириладиган картошкадан қарийб 2 баравар арзонга тушмоқда.
Шунингдек, 7 номдаги маҳсулот бўйича минимал нархлар ошган. Айниқса, помидор нархида энг катта ўсиш қайд этилган. Айтилишича, бу мавсумий омил билан боғлиқ.
8 номдаги маҳсулотнинг энг паст нархлари ўзгаришсиз қолган. Булар – буғдой уни, гуруч, макарон, оқбош карам, олма, товуқ гўшти (филе), сут ва шакар.
