Савдо-саноат палатаси ҳузурида Тадбиркор аёллар кенгаши ташкил этилади
"2025 йил аёллар бандлигини таъминлашда ҳал қилувчи йил бўлади. Жами 2 млн аёл бандлиги таъминланади", дейилади президент нутқида.
Савдо-саноат палатаси ҳузурида Тадбиркор аёллар кенгаши ташкил этилади. Бу ҳақда президент Шавкат Мирзиёев хотин-қизлар байрамига аталган байрам нутқида маълум қилди.
Ушбу кенгаш жойларда аёл тадбиркорларни қийнаётган ҳаётий муаммоларни ҳал қилиш бўйича тўғридан-тўғри парламент олдига масалалар қўяди.
Президентга кўра, Савдо-саноат палатаси раиси ўринбосари Нодира Шотурсунова бу ишларга бош-қош бўлади.
Бу йил 2 миллион нафар аёллар бандлигини таъминлаш, шундан 1 миллион 300 минг нафар хотин-қизни тадбиркорликка жалб этиш режа қилинган. Бунинг учун тижорат банклари томонидан аёллар тадбиркорлигини ривожлантириш учун қулай молиявий пакетлар тақдим этилади.
Бу йил маҳаллаларда аёллар тадбиркорлиги лойиҳалари учун қўшимча 3,3 триллион сўм ажратилади. Хусусан, оилавий тадбиркорлик дастурлари доирасида яна 100 миллион доллар берилади. Бунга қўшимча равишда тижорат банклари ҳам 100 миллион доллар жалб қилиб, маҳаллаларда ўзини ўзи банд қилган хотин-қизларга 50 миллион сўмгача гаровсиз кредитлар ажратади.
Шунингдек, маҳаллада 5 нафар аёлни бизнесга олиб кирган 1 минг нафар “устоз” тадбиркорларга 50 миллион сўмгача грант ажратилади.
Аёллар тадбиркорлигини ривожлантириш бўйича 4 босқичли янги тизим йўлга қўйилади.
"Умуман, 2025 йил аёллар бандлигини таъминлашда ҳал қилувчи йил бўлади. Хотин-қизларни касб-ҳунарга ўқитиш, ишли қилиш ва тадбиркорликни ривожлантириш ҳисобидан 2 миллион нафар аёлнинг бандлиги таъминланади", дейилади президент нутқида.
