Тошкент вилоятида бюджетдан 12 млрд сўмдан ошиқ пул ажратилади
Нурафшон шаҳридаги амфитеатр биносини тугаллаш ва юзага келган кредитор қарздорликни ёпиш учун 8 млрд сўм берилади.
Халқ депутатлари Тошкент вилояти кенгаши қарори билан катта миқдорда пул ажратилмоқда. Қарор маҳаллий бюджетнинг қўшимча манбаларидан фойдаланиш чора-тадбирларини ўз ичига олади.
Хусусан, эҳтиёжманд хотин-қизларнинг ўқиши учун шартнома пулларини тўлаш учун 1 млрд 243 млн сўм, "Фарзандим учун бир китоб" танловида совринли ўринларни эгаллаган мактабларни рағбатлантириш учун 600 млн сўм, Нурафшон шаҳридаги амфитеатр биносини қуришни тугаллаш ва юзага келган кредитор қарздорликни ёпиш учун 8 млрд сўм ажратилади.
Бундан ташқари, "Нуронийлар маскани" мажмуасини қуришда юзага келган қарздорликни бартараф этиш учун 1,4 млрд сўм, Халқ депутатлари Тошкент вилояти кенгаши депутатларини янги планшет билан таъминлаш учун 240 млн сўм ажратилади.
Вилоят қишлоқ хўжалиги бошқармасига моддий-техник базани яхшилаш учун 209 млн сўм берилади.
Ушбу қарор ижросини назорат қилиш вилоят ҳокимининг ўринбосари Ў. Турсунова ва маҳаллий кенгаш вакили М.Ғаниев зиммасига юкланган.
