Жиззах ва Самарқанддаги мактабларга ҳам автобус қўйилиши бошланади
Бу ҳақда Транспорт вазири Илҳом Маҳкамов Қонунчилик палатаси йиғилишида маълум қилди.
Жорий йил яна икки вилоятнинг олис ҳудудларидаги мактаб ўқувчилари учун автобус қўйиш бошланади.
Олий Мажлис Қонунчилик палатаси йиғилишида депутатлар мактаб ўқувчилари учун автобуслар қўйиш тажрибаси масаласини кўтарди.
Транспорт вазири Илҳом Маҳкамовга кўра, мактабларга автобуслар қўйиш ижобий натижа бермоқда.
Ҳозиргача Қашқадарё вилоятида 50 та, Сурхондарё вилоятида ҳам 50 та мактабда автобус қатновлари йўлга қўйилган.
Туманлар молия бўлимлари билан ҳамкорликда ташув тарифлари ва параметрлари белгиланган. Қашқадарё ва Сурхондарёдаги мактаблар йўналишлари чизилиб, биржага қўйилган. Айрим ҳолатларда йўлларнинг аҳволи бўйича муаммолар ҳам кўзга ташланган.
Тажриба 2025 йилда Самарқанд ва Жиззах вилоятларида амалга оширилади. Илҳом Маҳкамовнинг маълум қилишича, тажриба тез орада бошқа ҳудудларни ҳам қамраб олади.
Эслатиб ўтамиз, 2023 йил ёзида Шавкат Мирзиёев президентликка номзод сифатида Нукусда сайловчилар билан учрашувда мактабларга автобуслар қўйилиши ҳақида гапирганди.
