Си Цзинпин Москвадаги парадда қатнашади
Ўз навбатида Путин ҳам Пекинга ташриф билан бориши кутиляпти.
Москва ва Пекин ХХР раиси Си Цзинпин ва Россия президенти Владимир Путиннинг Иккинчи жаҳон урушидаги Ғалабанинг 80 йиллигини нишонлаш учун ўзаро ташрифига тайёргарлик кўрмоқда.
Бу ҳақда бугун, 10 февраль куни бўлиб ўтган брифингда Россия президенти матбуот котиби Дмитрий Песков маълум қилди.
"Биз ушбу саналарнинг рамзий маъносига ўша муҳим воқеалар хотираси, мамлакатларимизнинг фашистларга қарши курашга қўшган ҳиссаси учун ҳам, икки томонлама муносабатларимиз учун ҳам катта аҳамият берамиз. Шунинг учун ҳозирда бундай алоқаларга фаол тайёргарлик кўрилмоқда", деди Песков журналистларга.
Аввалроқ Россиянинг Хитойдаги элчиси Игор Моргулов Си Цзинпин 9 майга режалаштирилган ғалабанинг 80 йиллиги муносабати билан Москвада ўтказиладиган тантанада иштирок этиш таклифини қабул қилгани ҳақида хабар берган. Си Цзинпин, шунингдек, сентябр ойи бошида россиялик ҳамкасбини Иккинчи жаҳон урушидаги Ғалаба байрамини нишонлаш учун Хитойга таклиф қилди.
Си Цзинпин Москвага охирги марта 2023 йилда ташриф буюрган. Унинг уч кунлик ташрифи март ойида бўлиб ўтган ва у ҳам Владимир Путиннинг таклифига биноан амалга оширилган.
