Чирчиқда собиқ банк бошқарувчиси судга тортилди
У банк пулларини растрата қилиш, гаров тақиқини асоссиз ечиб юбориш каби қонунбузарликларни содир этган.
Жиноят ишлари Чирчиқ шаҳар судида фирибгарликда айбланган собиқ банк бошқарувчисига оид иш кўриб чиқилди. Суд иши Platina.uz ихтиёрида мавжуд.
Маълум бўлишича, Д.Э. 2022 йил 1 апрелдан 2023 йил 18 апрелга қадар "Х" банк Чирчиқ шаҳар филиали бошқарувчиси лавозимида фаолият юритиб келиб, мансабдор шахс бўлган ҳолда эгаллаб турган мансаб мавқеини суиистеъмол қилган.
У филиалнинг кредитлар мониторинги ва муаммоли кредитлар билан ишлаш бўлими бошлиғи Ж.Б. билан жиноий тил бириктирган. У жами бўлиб 14 та ҳолатда 20 млн. 863 минг 500 сўм маблағларни “Alisher-Saloxiddin Nasl Chorvador” МЧЖнинг муддати ўтган кредит қарздорлигини сўндириш учун асоссиз йўналтирган.
Шундан сўнг Д. Э. филиалнинг кредитлар мониторинги ва муаммоли кредитлар билан ишлаш бўлими бош мутахассиси А.А билан жиноий тил бириктириб, жами 123 млн. 380 минг 800 сўм пул маблағларини растрата қилиб, банк манфаатларига кўп миқдорда зарар етказган.
Бундан ташқари бошқарувчи кредитга олинган "Каптива" автомобилига гаровни тақиқдан ечиб юборганлиги оқибатида 40 млн. 986 минг 333 сўмлик кредит қарздорлиги гаров таъминотисиз қолган, банк манфаатларига жиддий зарар етказилган.
Суд мажлисида сўроқ қилинган судланувчи Д.Э. айбига қисман иқрорлик билдирди.
Суд ҳукмига кўра, у ЖК 167-моддаси 2-қисмининг “а,б,в,г” бандлари ва 209-моддасининг 1-қисми билан айбли деб топилди. Унга узил-кесил мансабдорлик лавозимларида ва моддий жавобгарлик билан боғлиқ вазифаларда ишлаш ҳуқуқидан 2 йил 6 ой муддатга маҳрум қилиб, ойлик иш ҳақининг 20 фоизини давлат даромади ҳисобига ушлаб қолган ҳолда 2 йил 9 ой ахлоқ тузатиш ишлари жазоси тайинланди. Иш бўйича етказилган моддий зарар тўлиқ қопланган.
Суд иши Олий суд порталидан олинди.
