Фермер банк мансабдорлари билан тил бириктириб, катта пулларни ўзлаштиргани аниқланди
У далолатномага фермер хўжалигининг қарийб 80 гектар майдонига пахта экилганлиги ҳақида сохта маълумотлар киритиб, кредит олишга муваффақ бўлган.
Жиноят ишлари бўйича Навбаҳор туман судида масъул шахслар билан тил бириктириб, йирик миқдордаги пулларни ўзлаштирган фермер хўжалиги раҳбарига ҳукм ўқилди. Суд ҳукми Platina.uz ихтиёрида мавжуд.
Унга кўра, фуқаро Х.Х фермер хўжалигига раҳбарлик қилиб, ноқонуний йўллар билан жиноий бойлик орттириш мақсад қилган. У фермер хўжалигига қарашли бўлган сув насосини ноқонуний улаб электр таъминоти корхонаси билан тузилган шартномани бузган, истеъмолчи томонидан электр ҳисоблагич кўрсаткичларини қасддан камайтириш мақсадида унга ташқи таъсир кўрсатиш йўли билан сув насосини қонунга хилоф равишда улаган.
Натижада Қизилтепа туман электр тармоқлари корхонаси манфаатларига 53 млн. 316 минг сўм миқдорида зарар етказган.
Бундан ташқари у фермер хўжалиги раиси вазифасида ишлаб келиб, мансабдор шахс ҳисобланиб, "А" банк Қизилтепа филиали мансабдор шахслари билан ўзаро жиноий тил бириктириб, 1 йил муддатга йиллик 10 фоиз устама тўлаш шарти билан 575 млн 500 минг сўмлик имтиёзли кредит маблағи ажратилишига эришган.
У далолатномага фермер хўжалигининг 78,35 гектар майдонига пахта экилганлиги ҳақида сохта маълумотлар киритиб, ҳужжатни қалбакилаштириб, уни банкка тақдим қилган ва жами 397 млн. 173 минг 280 сўмлик жуда кўп миқдордаги кредит маблағларини ажратилишига эришиб, кредит маблағларини ўзининг шахсий эҳтиёжлари учун сарфлаб юборган.
Судда айбланувчи ўз айбларига иқрор бўлди.
Якуний ҳукмга кўра, Х.Х.га ўташ учун 2 йил 5 ой 15 кун муддатга ахлоқ тузатиш ишлари жазоси тайинланди. Иш доирасида етказилган зарарлар қопланишига эришилган.
Суд иши Олий суд порталидан олинди.
