Чирчиқ ва Ангренда икки ишчи бахтсиз ҳодиса қурбонига айланди
Чирчиқда ишчи шифтга гипсакартон ўрнатиш учун монтаж қилиш жараёнида баландликдан йиқилиб вафот этган.
Тошкент вилоятининг Чирчиқ ва Ангрен шаҳарларида икки ишчи фаолияти вақтида бахтсиз ҳодиса қурбонига айланиб вафот этди. Бу ҳақда вилоят Камбағалаллик ва бандлик бошқармаси эълон қилган буйруқда маълум қилинган.
Биринчи буйруққа кўра, Чирчиқ давлат педагогика университети 4-сонли ўқув биносини мукаммал таъмирлаш ишларида ишлаган 01.05.1984 йилда туғилган фуқаро Қ.Ш. шифтга гипсакартон ўрнатиш учун профил монтаж қилиш жараёнида баландликдан йиқилиши натижасида вафот этган.
Ангрендаги корхонанинг кесиш бўлимида оператор лавозимида ишлаган 01.06.1994 йилда туғилган ишчи М.А. эса газаблокларни тозалаш ускунаси олдида чиқиндиларни тозалаётган вақтида паддон ва кран кўтарувчи ускуна орасига қисилиб қолиши натижасида оғир тан жароҳати олиб вафот этган.
Бошқарма эълон қилган ҳужжатларга кўра, ҳодисалар юзасидан комиссия тузилиб, текшириш ишлари олиб борилмоқда. Аниқланган маълумотлар тегишли ташкилотларга тақдим этилади.
Таъкидлаш керакки, март ойида ҳам вилоятда икки ишчи қурбон бўлгани маълум қилинганди.
