Ижтимоий объектларга мўлжалланган минглаб тонна кўмир талон-торож этилгани айтилмоқда
Қорақалпоғистонда масъуллар умумий баҳоси 1 млрд сўмлик жами 2,5 минг тонна кўмирни талон-торож қилгани аниқланган.
Ижтимоий соҳа объектларини иситиш учун етказиб берилган кўмирни талон-торож қилганлар аниқланди.
Бош прокуратура ҳузуридаги Департаментнинг Нукус тумани бўлими томонидан терговга қадар текширув ўтказилган.
Унда давлат хусусий шерикчилик битимига асосан кўмир етказиб берувчи “N.A.” МЧЖга ижтимоий соҳа объектларини иситиш учун етказиб берилган кўмир ўлчовдан ўтказилганида, МЧЖ масъул шахслари умумий баҳоси 1 млрд сўмлик жами 2 514 тонна кўмирни талон-торож қилганликлари аниқланган.
Шу каби, Департаментнинг Наманган вилояти бошқармаси томонидан терговга қадар текширув ўтказилган. Давлат хусусий шерикчилик битимига асосан кўмир етказиб берувчи “O.D.” МЧЖ раҳбари О.Қ. ва бошқалар куз-қиш мавсумида Косонсой туманидаги бюджет ташкилотларини иситиш учун ажратилган умумий баҳоси 263,1 млн сўмлик 609,9 тонна кўмирни бошқа шахсларга қиммат нархларда сотиб юбориб, талон-торож қилганликлари аниқланган.
Мазкур ҳолатлар юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят ишлари қўзғатилиб, тергов ҳаракатлари ўтказилмоқда.
