Ўзбекистон бўйлаб 37 мингдан ошиқ беморга кафолатланмаган тиббий хизмат кўрсатилгани аниқланди

Рақобат қўмитаси томонидан Давлат тиббиёт муассасалари ва хусусий клиникаларда тиббиёт учун мўлжалланган ўлчаш ва синаш воситаларининг метрологик кўрикдан ўтказилганлиги ва улардан беморлар кўригида фойдаланилиш ҳолати ўрганилди.

Қорақалпоғистон Республикаси мисолида

Қорақалпоғистон Республикаси Рақобат қўмитаси Хўжайли тумани тиббиёт бирлашмасида ўрганиш ўтказилди.

Тиббиёт бирлашмаси томонидан метрология текширувидан ўтказилмаган жиҳозлардан кўрсатилган хизматлари учун истеъмолчилардан олинган маблағларни қайта ҳисоб-китоб қилинганда, метрология текширишидан ўтказилмаган “Portativ EKG”дан 2024-йил апрел ойидан август ойигача бўлган муддат оралиғида 88 та истеъмолчилардан 2 640 000 сўм олинганлиги аниқланган.

Бухоро вилояти мисолида

Ҳудудий бошқарма томонидан Бухоро вилоят кўп тармоқли тиббиёт маркази томонидан тиббий пуллик хизматлар нарх(тариф)ларини ўрганиш давомида тиббиёт маркази томонидан 2023-2024-йиллар давомида функционал диагностика бўлимида кўрсатилган хизматларда жами 152 млн сўмдан ортиқ пул маблағлари амалда тўланмаган иш ҳақи меҳнат харажатлари ошириб киритиш эвазига 35 172 та истеъмолчилардан ортиқча олинганлиги ҳолатлари аниқланди.

Сурхондарё вилояти мисолида

Ҳудудий бошқарма томонидан Олтинсой туман тиббиёт бирлашмаси 2024 йил январ ойидан октябр ойигача тиббиёт учун мўлжалланган ўлчаш ва синаш воситаларининг метрологик кўрикдан ўтказилганлиги ҳолати ва улардан беморлар кўригида фойдаланилиши орқали истеъмолчилардан олинган тўловлар маълумотларининг солиштируви асосида ўрганиш ўтказилди.

Олиб борилган ўрганиш натижаларига кўра, Олтинсой туман тиббиёт бирлашмасида истеъмолчиларга кўрсатилган хизматлар ҳисобидан 398 нафар номуайян истеъмолчига 8 940 000 сўмлик 1 та хизмат тури бўйича беморларга метрологик текширувдан ўтказилмаган тиббий синаш ва ўлчаш воситалари қўлланилган ҳолда хизматлар кўрсатилганлик ҳолатлари аниқланди.

Қашқадарё вилояти мисолида

Ҳудудий бошқарма томонидан вилоятда фаолият юритаётган тиббиёт муассасаларидаги тиббиёт учун мўлжалланган ўлчаш ва синаш воситаларининг метрологик кўрикдан ўтказилганлиги ҳолати ва улардан беморлар кўригида фойдаланилиши ҳолати таҳлил қилинди. Таҳлил натижаларига кўра, Республика ихтисослаштирилган Онкология ва Радиология илмий-амалий тиббиёт маркази Қашқадарё филиалида истеъмолчиларга кўрсатилган хизматлар ҳисобидан 1 352 нафар сондаги номуайян истеъмолчиларга 38 293 000 сўмлик 2 турдаги хизмат тури бўйича бўйича беморларга метрологик текширувдан ўтказилмаган тиббий синаш ва ўлчаш воситалари қўлланилган ҳолда хизматлар кўрсатилганлиги аниқланди.

Тошкент вилояти мисолида

Ҳудудий бошқарма томонидан ўлчаш функцияларига эга бўлган тиббий техниканинг метрологик назоратдан ўтказилганлиги юзасидан Олмалиқ шаҳрида фаолият олиб бораётган “KARDIO-SONO MED SERVIS” МЧЖ тиббий техникаларининг даврий синовдан ўз вақтида ўтказилмаганлик ҳолати аниқланди.

Юқоридагиларга кўра, хизмат кўрсатувчи Давлат тиббиёт муассасалари ва хусусий клиникалар томонидан (Хўжайли тумани тиббиёт бирлашмаси, Бухоро вилоят кўп тармоқли тиббиёт маркази, Олтинсой туман тиббиёт бирлашмаси, Республика ихтисослаштирилган Онкология ва Радиология илмий-амалий тиббиёт маркази Қашқадарё филиали ва “KARDIO-SONO MED SERVIS” МЧЖ) жами 37 мингдан ортиқ истеъмолчиларга кафолатланмаган хизматлар кўрсатилганлиги аниқланган.

Рақобат қўмитаси томонидан тиббиёт масканларга нисбатан, қонунбузилиш ҳолатининг бартараф этилиш ва ортиқча олинган пул маблағларни истеъмолчиларга қайтариш юзасидан бажарилиши мажбурий бўлган кўрсатмалар берилди.