Бобур ҳайкалини кўчиришда илмий кенгаш билан келишиш керак
Маданий мерос агентлигининг Андижондаги ҳолат бўйича берган изоҳига кўра, ҳайкал маданий мерос рўйхатига киритилган.
Андижон шаҳридаги Бобур ҳайкалини кўчириб ўтказиш бўйича қарорга Маданий мерос агентлиги муносабат билдириб, агентлик ҳузуридаги Илмий-эксперт кенгаши билан келишиш кераклигини таъкидлаган.
Қайд этилишича, Бобур монументал санъат ёдгорлиги Вазирлар Маҳкамасининг 2019 йил 4 октябрдаги 846-сонли қарори билан Моддий маданий меросининг кўчмас мулк объектлари миллий рўйхатига киритилган.
Давлат кадастрлари палатаси Андижон вилояти бошқармаси 8 ноябр куни ҳайкални Фитрат кўчасидаги “Жоме меъморий мажмуаси” архитектура ёдгорлиги ҳудудига кўчириш бўйича мурожаат қилган.
Агентликнинг эслатишича, бундай лойиҳаларга Маданий мерос агентлиги ҳузуридаги Илмий-эксперт кенгаши хулоса беради. Бобур ҳайкалини кўчириш масаласи юзасидан ҳам тегишли ташкилотларга кенгаш хулосасини олиш учун тушунчалар берилган.
Маълумот учун, Президентнинг 2021 йил 19 июндаги ПҚ-5150-сонли қарорининг 4-бандида:
- соҳага оид норматив-ҳуқуқий ҳужжатлар лойиҳалари ва моддий маданий мероснинг кўчмас мулк объектлари жойлашган аҳоли пунктларининг бош режалари агентлик билан келишилиши мажбурий ҳисобланиши;
- моддий маданий мероснинг кўчмас мулк объектларида, алоҳида муҳофаза қилинадиган тарихий-маданий ҳудудларда, Умумжаҳон мероси рўйхатига киритилган ҳудудларда ва уларнинг қўриқланадиган теграларида объектларни қуриш, бузиш ва ободонлаштириш ишларининг лойиҳалари агентлик билан мажбурий тартибда келишилиши белгилаб қўйилган.
Эслатиб ўтамиз, Андижон вилояти ҳокимлиги ҳайкални кўчиришни Бобур хотирасига атаб барпо этилган майдон янги қурилаётган кўприк яқинида жойлашгани, лойиҳа қурилиши якунлангач, ушбу майдон анчайин ёпиқ кўринишга келиб, майдоннинг бир қисми кўприк остида қолиши билан изоҳлаганди.
