Ливандаги БМТ кучлари штаб-квартирасига снаряд келиб тушди
Италиялик бомба бўйича мутахассислар тезда ҳудудни ўраб олган ва назорат остида портлашни амалга оширган.
БМТнинг Ливандаги Муваққат кучлари штаб-квартираси артиллериядан ўққа тутилди.
Бу ҳақда ташкилотнинг Телеграм-каналидаги хабарда айтилган.
"15 ноябр тушдан кейин Шама шаҳридаги БМТ кучлари штаб-квартирасига 155 миллиметрли артиллерия снарядлари келиб тушди. Снаряд портламади", - дейилади хабарда.
Қайд этилишича, италиялик бомба йўқ қилиш бўйича мутахассислар тезда ҳудудни ўраб олган ва назорат остида портлашни амалга оширган. Тинчликпарвар кучлардан ҳеч ким жабрланмаган.
Айрим таҳлилчиларга кўра, катта эҳтимол билан бу Исроил кучлари снарядидир. Аввалроқ Исроил мудофаа вазири Исроил Кац Ливанда ўт очишни тўхтатиш шартларини эълон қилган эди. Унинг сўзларига кўра, Исроил" Ҳизбуллоҳ" ҳаракатини тугатиш бўйича мақсадларига эришмагунча унга зарба беришда давом этади.
