Чиқиндидан қарздорлар токка пул тўлолмай қолади

2024 йил 1 ноябрдан чиқиндидан қарзи бор фуқароларга электр энергияси учун тўлов қилишда чекловлар ўрнатилади. Бу ҳақдаги президент қарори йил бошида имзоланган.

Аммо 1 ноябр бошланишига бир неча кун қолган бўлса-да, бу ҳақида аниқ ва шаффоф механизм йўқлиги, тушунтириш берилмагани муҳокамаларга сабаб бўлмоқда.

Қарорга кўра, чиқинди хизматлари бўйича қарздорликни бартараф этмаганига қадар абонентларнинг электр энергияси учун тўловларини қабул қилишни вақтинчалик чеклаш жорий қилинади. Чеклов:

• 2024 йил 1 июндан Тошкент ва Нукус шаҳарларида, шунингдек, вилоят марказларида чиқинди хизматлари бўйича 6 ойлик қарздорлик бўйича;
• 2024 йил 1 ноябрдан бошлаб республиканинг барча ҳудудларида чиқинди хизматлари бўйича 3 ойлик қарздорлик бўйича;
• 2025 йил 1 январдан бошлаб республиканинг барча ҳудудларида чиқинди хизматлари бўйича 1 ойлик қарздорлик учун қўлланилади.

Эътибор беринг, Тошкент ва Нукус шаҳарларида бу механизм аллақачон ишга тушган бўлиши керак. Аммо амалда ундай эмас. Яқинда шов-шув бўлиб кетган ҳолатда чиқиндидан қарздор айрим истеъмолчилар токдан узиб қўйилгани кузатилган.

Эътибор беринг, қарздор истеъмолчилар биратўла токдан узиб қўя қолинган. Аслида эса чеклов киритилиши керак эди. Чеклов қандай бўлиши ҳозирча мавҳум.

Ушбу масалага аниқлик киритиш мақсадида Platina.uz сайти "Ҳудудий электр тармоқлари" матбуот хизмати билан боғланди. Бироқ матбуот котиби саволларимизга жавоб беришни истамади.