Илон Маск уч ойда Трамп кампанияси учун қарийб 75 миллион доллар хайрия қилди
Дунёнинг энг бой одами бўлган миллиардер сўнгги пайтларда очиқдан очиқ Трампни қўллаб-қувватламоқда.
Америкалик тадбиркор Илон Маск уч ой давомида АҚШ президентлигига номзод Доналд Трамп сайловолди кампаниясини қўллаб-қувватлаш учун деярли 75 миллион доллар хайрия қилди. Бу ҳақда АҚШ Федерал сайлов комиссияси (FEC) хабар бермоқда.
FEC маълумотларига кўра, Маскнинг июлдан сентябргача бўлган умумий хайриялари 74,95 миллион долларни ташкил қилган. 24 октябрь куни сайлов комиссиясига яна бир ҳисобот тақдим этилади, у 1 октябрдан 16 октябргача бўлган даврни қамраб олади.
Аввалроқ Маск Трампни "демократияни қутқара оладиган ягона шахс" деб атаган эди.
Октябр ойи бошида Пенсилваниядаги митинглардан бирида Маск Трамп ёнида иштирок этди.
У шунингдек, агар Трамп ютқазса, бўлажак президентлик пойгаси охиргиси бўлиши мумкинлигини айтди. Маскка кўра, агар сайловда демократ номзод Камала Харрис ғалаба қозонса, мигрантлар овози ёрдамида унинг партияси етакчилик қилади.
