Пул ўтказмалари акциясида муҳим маълумотлар яширилгани маълум бўлди

Рақобат қўмитаси "Sello pay" иловаси орқали пул ўтказмалари бўйича жарима белгилади. 

Улар фойдаланувчилардан ммуҳим маълумотларни яширишда айбланган. 

Рақобат қўмитаси томонидан ўтказилган ўрганишлар давомида, “MARKETPLACE TRADING” АЖ томонидан Тошкент шаҳридаги ташқи реклама объектида эълон қилинган “Sello Pay” – пул ўтказмалари учун "0 %” мазмунидаги реклама жойлаштирилганлиги кузатилди.

Шунингдек, “MARKETPLACE TRADING” АЖнинг расмий веб-сайтида  “Sello Pay” мобил иловаси орқали пластик карталарга пул ўтказмалари бўйича акция 2024 йил 1 июлдан бошланиши, мазкур акция шартларига кўра идентификациядан ўтган барча фойдаланувчилар учун дастлабки уч ой учун амал қилиши, комиссиясиз ойлик ўтказма суммаси лимити 3 000 000 сўмни ташкил этиши ва ойлик ўтказма суммаси ушбу лимитдан ошиб кетган тақдирда 1% миқдорида ўтказма комиссияси олиниши белгиланган. Аммо, мобил илова пул ўтказмалари рекламасида ушбу акция шартлари тўғрисида муҳим маълумотлар берилмаганлик ҳолатлари аниқланди.

Юқоридагиларга кўра, Қўмита Махсус комиссияси томонидан “Реклама тўғрисида”ги Қонуннинг 16, 21 ва 43 моддалари ва “Истеъмолчилар ҳуқуқларини ҳимоя қилиш тўғрисида”ги Қонуннинг 7-моддаси талаблари бузилиш аломатлари юзасидан “MARKETPLACE TRADING” АЖга нисбатан иш қўзғатилиб, натижаси юзасидан белгиланган тартибда  молиявий  жарима қўлланилди. 

 Шунингдек,  қонунбузилиш ҳолатини бартараф этиш ва келгусида унга йўл қўймаслик бўйича кўрсатма берилди.