Павел Дуровга қандай айбловлар қўйилгани маълум бўлди
БАА ҳукумати эса Дуров иши бўйича Францияга сўров юборган. Телеграм асосчиси сўнгги йилларда Дубайда истиқомат қилиб келаётганди.
Францияда Телеграм мессенжери асосчиси Павел Дуров сўроқ қилинаётган иш 8 июль куни очилган бўлиб, унда 12 та жиноят бўйича айблов бор.
Бу ҳақда 26 август, душанба куни Париж прокуратураси маълум қилди.
Бу айбловлар орасида ҳокимият органлари билан ҳамкорлик қилмаслик, вояга етмаганларнинг порнографик тасвирларини сақлаш ва тарқатишда иштирок этиш, гиёҳвандлик воситаларини олиш, ташиш, сақлаш, сотиш ёки жўнатишда иштирок этиш, уюшган гуруҳ таркибида фирибгарликда қатнашиш ва бошқалар киради.
Кўриб чиқилаётган иш, шунингдек, ваколатли органлар сўровига кўра, қонун доирасида ушлаш учун зарур бўлган маълумот ёки ҳужжатларни тақдим этишни рад этиш юзасидан ҳам қўзғатилган.
Франция ҳуқуқ-тартибот идораларидаги манба Reuters агентлигига француз ҳукумати Дуровни Телеграмда кибержиноятлар ва молиявий жиноятларга қарши курашда полиция билан ҳамкорлик қилишдан бош тортгани учун ҳибсга олганини маълум қилган.
БАА Ташқи ишлар вазирлиги Павел Дуров ишини диққат билан кузатиб бораётганини маълум қилди – улар Франция ҳукуматига зудлик билан барча консуллик хизматларини тақдим этиш бўйича сўров юборган.
Баёнотда фуқароларга ғамхўрлик қилиш, уларнинг манфаатларини ҳимоя қилиш, ишларини назорат қилиш ва уларга ғамхўрлик кўрсатишнинг барча жабҳаларини таъминлаш БАА учун устувор вазифа эканлиги қайд этилган.
Павел Дуровнинг тўртта давлат фуқаролигига эга - Россия, Цент-Китс ва Невис, БАА ва Франция.
39 ёшли миллиардер Павел Дуров 24 август куни Бокудан шахсий самолётида келган Париж Ле Бурже аэропортида қўлга олинди. У терроризм, гиёҳвандлик, фирибгарлик ва болаларга қарши жиноятларда айбланиши мумкин. Бу айбловлар бўйича Дуров камида 20 йиллик қамоқ жазосига ҳукм қилиниши мумкин.
