Нетаняху Абу-Дабига яширин ташриф билан борди — ОАВ
Нетаняхунинг БАА президенти билан учрашуви "Haaretz" газетасининг янги хабаридан кейин бўлди. Газета ёзишича, Шайх Муҳаммад 2023 йил 7 октябр ҳужумидан бир ярим ҳафта олдин Нетаняхуни ҲАМАС Исроилга зарба тайёрлаётгани ҳақида огоҳлантирган.
Исроил Бош вазири Бинямин Нетаняху якшанба куни Абу-Дабига бориб, БАА президенти Шайх Муҳаммад бин Зайд Ол Наҳайён билан учрашди. Бу ҳақда "Reuters"га Исроилнинг юқори мартабали расмийси маълум қилди. Нетаняху идораси ҳам, БАА Ташқи ишлар вазирлиги ҳам ҳозирча изоҳ бермади.
Сафар "Haaretz" газетасининг ёзишича, Шайх Муҳаммад 2023 йил 7 октябр ҳужумидан бир ярим ҳафта олдин Нетаняхуни ҲАМАС Исроилга катта зарба тайёрлаётгани ҳақида огоҳлантирган. "Haaretz" бу огоҳлантириш Исроил разведкаси ва армиясига етказилмаганини ҳам қўшган.
Нетаняху бу хабарни рад этиб, газетани судга бериш билан қўрқитган.
Абу-Даби "Haaretz" хабарига изоҳ бермади. Аммо 2020 йилда дипломатик алоқалар ўрнатилганидан бери Исроиль билан "очиқ ва тўғридан-тўғри алоқа каналлари" борлигини олдин ҳам айтган. Илгари БАА манбаси "Reuters"га хавфсизлик масалалари бошқа давлатлар билан тегишли идоралар орқали муҳокама қилинишини, лекин бу жараён раҳбарлар даражасида бўлмаслигини билдирган эди.
Шу йил бошида ҳам шунга ўхшаш ҳолат кузатилган эди. Май ойида Нетаняху идораси бош вазир БААга "махфий ташриф" билан бориб, президент билан учрашганини эълон қилган, БАА эса бундай учрашувни рад этган. "Reuters"га гапирган манбага кўра, ўшанда учрашув 26 мартда Уммон чегараси яқинидаги Ал-Айн шаҳрида бўлган.
"Эрон билан уруш пайтида ҳужумга учрагач, БАА АҚШ ва Исроил билан алоқаларини мустаҳкамлади. Икки давлат 2020 йилдаги Иброҳим келишувлари доирасида дипломатик муносабат ўрнатган. Исроил билан алоқа Абу-Дабига минтақада таъсирини ошириш имконини беради ва Вашингтон билан мулоқотда қўшимча канал вазифасини ўтайди", — дейилади "Reuters" хабарида.
