Тошкент вилоятида 3 нафар ҳоким жазоланди

Тошкент вилояти ҳокими Зойир Мирзаевнинг қарори билан Янгийўл тумани ҳокими Одилжон Касимович Атауллаев, Чиноз тумани ҳокими Шерзод Абдухакимович Салиховларга нисбатан "ҳайфсан" интизомий жазо чораси қўлланилди.

Зангиота тумани ҳокими Эркин Эркамович Рустамов эса сўнгги бор қатъий огоҳлантирилди.

Бунга Тошкент вилоятининг Зангиота, Янгийўл ва Чиноз туманлари ҳудудидан ўтувчи М-39 "Тошкент – Термиз" автомобиль йўли минтақасида экилган мевали ва манзарали дарахт кўчатларини доимий суғориш ва парваришлаш билан боғлиқ ишлар етарлича ташкиллаштирилмаганлиги сабаб бўлган.

Шунингдек, юқорида қайд этилган камчиликларни бартараф этишда сусткашликка йўл қўйганлиги ва ўзига юклатилган вазифаларни лозим даражада бажармаганлиги учун Янгийўл тумани ҳокими ўринбосари Баҳриддин Абдусатарович Каримов ҳамда  Чиноз тумани ҳокими ўринбосари Тоҳир Гапурович
Тажибаев қатъий огоҳлантирилган.

Бундан ташқари вилоятда бошқарув сервис компанияларда дебитор қарздорликларни қисқартирилиши юзасидан ўтказилиши режалаштирилган йиғилишга пухта тайёргарлик кўрмаганлиги ҳамда ижро интизомига риоя қилмаганлиги учун вилоят ҳокимлиги шаҳарлар инфратузилмасини ривожлантириш, ободонлаштириш ва коммунал хўжалик масалалари бўйича котибият мудири Мансур  Худайкуловга нисбатан ҳам ҳайфсан берилди.