Наманганда давлат банки кассири 3-қаватдан итариб юборилди
Мазкур ҳолат бўйича Бош прокурор матбуот котиби Ҳаёт Шамсиддинов Platina.uz сайтига тафсилотларни очиқлади.
Наманган шаҳар Обиҳаёт маҳалласида ижара асосида яшаб келаётган 22 ёшли Х.М.Қ. ва унинг таниши Н.Л.Н. билан биргаликда давлат банки кассири 21 ёшли М.А.Ж. билан ўзаро тортишиб жанжаллашган.
Бош прокурор матбуот котиби Ҳаёт Шамсиддинов Platina.uz сайтига маълум қилишича, улар кассирни қасддан ўлдириш мақсадида уй ойнаси ромига мажбурлаб чиқариб, уни 3-қаватдан пастга мажбуран суриб, ташлаб юборган. Шундан сўнг, улар “Спарк” машинасида воқеа жойидан қочиб кетиб яширинган.
Банк кассирига ўша пайтда ҳовлида бўлган фуқаролар ёрдам кўрсатиб, Республика шошилинч тез ёрдам илмий марказининг Наманган филиалига олиб боришган.
Шифокорларнинг дастлабки маълумотномасида кассир жароҳатлари оғирлик даражасига кўра “ҳаёт учун хавфли бўлган оғир тан жароҳати” гуруҳига кириши айтилган. Ҳозир унга тиббий ёрдам кўрсатиляпти.
Мазкур ҳолат юзасидан ЖКнинг 25,97-моддаси 2-қисми “п” банди билан жиноят иши қўзғатилиб, Х.М.Қ. ва Н.Л.Н. ЖПКнинг 221-моддаси тартибида ушланган.
