Украинада қозоғистонлик мухолиф отиб кетилди
Айдос Содиқов 2022 йил январ ойидаги намойишларни фаол қўллаб-қувватлаганди.
Киевда қозоғистонлик фаол ва мухолифатчи Айдос Содиқовга бир неча марта ўқ узилди, деб хабар бермоқда Украинанинг Strana нашри. Унинг аҳволи оғир дея баҳоланмоқда.
Сўнгги йилларда Содиқов Қозоғистоннинг амалдаги ҳукуматини, жумладан, мамлакатнинг амалдаги президенти Қосим-Жўмарт Тўқаевни "Россияга ишлаганликда" айблаб, танқид қилган.
Айдос Содиқов Қозоғистоннинг Россия билан чегарадош Ақтўбе вилояти Қорабутак қишлоғида туғилган. Ақтўбе педагогика институтининг тарих факультетини тамомлаган.
Ўз ватанида Содиқов 2010 йилда безориликда айбланиб, икки йилга озодликдан маҳрум этилган. Кейин у ва унинг тарафдорлари жиноят ишини уйдирма деб атаган. Содиқов фаол ижтимоий фаолият билан шуғулланиб, норозилик намойишлари уюштирган.
У, шунингдек, 2022 йил январида Қозоғистондаги норозилик намойишларини фаол қўллаб-қувватлаган. Фаол ўзаро нафрат уйғотганликда айбланиб қидирувга берилган.