Сирил Рамафоса иккинчи бор ЖАР президенти этиб сайланди
Рамафоса илк бор 2018 йилда ҳокимиятга келганди. Унинг партияси парламент сайловларида кўпчилик ўринни йўқотди.
Жанубий Африка парламенти қуйи палатаси (Жанубий Африка Республикаси Миллий ассамблеяси) депутатлари Сирил Рамафосани мамлакат президенти этиб қайта сайлади, деб хабар бермоқда мамлакат ОАВлари.
Овоз беришда қатнашган 339 депутатдан 283 нафари Рамафоса учун овоз берди.
29 май куни мамлакатда парламент сайловлари бўлиб ўтганди. Жанубий Африка Конституцияси сайловдан сўнг икки ҳафта ичида Миллий Ассамблеянинг Президент, Спикер ва Спикер ўринбосарини сайлаш учун йиғилишини талаб қилади.
1994 йилдан бери ҳукмронлик қилиб келаётган Африка Миллий Конгресси (АМК) илк бор кўпчилик ўринни йўқотди ва миллий бирлик ҳукуматини яратиш учун коалиция тузишга ҳаракат қилмоқда. Кузатувчилар, 2018 йилдан буён Жанубий Африка президенти бўлиб келган АМК раҳбари Рамафоса қайта сайланишга эришади, бироқ шу билан бирга у бошқа партияларга ён беришга мажбур бўлишига ишонишмоқда.
Эслатиб ўтамиз, Рамафоса 2018 йилда Жейкоб Зума ҳокимиятдан кетганидан сўнг президент этиб сайланганди.
Телеграмда кузатиб боринг!
