Россияда икки трамвай тўқнашди, юзга яқин киши жабрланган
Бундан ташқари бир йўловчи вафот этган. Айтилишича, трамвайлардан бирининг тормози ишламай қолган.
Россиянинг Кемерово шаҳрида трамвай тўқнашуви оқибатида 90 киши жабрланди, улардан уч нафарининг аҳволи оғир, деди ҳудуд губернатори. Шунингдек, бир киши вафот этган, жабрланганларнинг етти нафари болалардир.
Хавфсизлик талабларига жавоб бермайдиган хизматлар кўрсатиш юзасидан иш қўзғатилган.
"Жабрланганлардан уч нафарининг аҳволи оғир – иккитаси реанимацияда, бири операция хонасида. Шифокорлар ҳаётлари учун курашмоқда. Ўн киши амбулатор даволанишга жўнатилди", — деб ёзди Кемерово вилояти губернатори вазифасини бажарувчи Иля Середюк ўз Телеграм-каналида.
Аввалроқ шаҳар мэри Дмитрий Анисимов жабрланганлар сони 50 нафарни ташкил қилгани ҳақида хабар берган эди. Воқеа содир бўлган ҳудудда транспорт ҳаракати тўсиб қўйилган, бепул транспорт йўналишлари ташкил этилган. Қурбонларнинг қариндошлари учун ишонч телефони мавжуд.
Ҳодиса маҳаллий вақт билан соат 07:30 да Логовая шоссесида содир бўлган. Маҳаллий нашрларнинг хабар беришича, аварияга техник носозлик сабаб бўлган — трамвайлардан бирининг тормози ишламай қолган.
Тергов қўмитаси хавфсизлик талабларига жавоб бермайдиган хизматлар кўрсатиш (Жиноят кодексининг 238-моддаси 2-қисми) бўйича иш қўзғатди, бу олти йилгача озодликдан маҳрум қилиш билан жазоланади. Маҳаллий прокуратура ҳам тергов бошлаган.
