Ишчи гуруҳ кўрган боғчаларни дарҳол ёпиш керак – Нурмат Отабеков
Андижон вилоятидаги боғчаларнинг айримларида чириган картошка овқатга қўшилгани аниқланган.
Олий мажлис Сенати вакилларидан тузилган ишчи гуруҳ Андижон вилоятидаги Мактабгача таълим муассасаларининг фаолияти, хусусан, уларда болаларни овқатлантириш масаласи билан танишди.
Текширувлар давомида бир қатор жиддий камчиликлар аниқланган.
Хусусан, Санитария-эпидемиологик осойишталик ва жамоат саломатлиги қўмитаси раисининг биринчи ўринбосари Нурмат Отабековнинг айтишича, МТТМлар овқат тайёрлаш учун олиб келадиган масаллиқ ва озиқ-овқатлар санитария нормалари ва талабларига зид шароитда сақланади. Чириган ва кўклаб кетган картошкалар ташлаб юборилмасдан, болалар учун тайёрланаётган овқатга ишлатилади.
“МТТМларда идиш-товоқлар ҳам етишмайди”, дейди Отабеков. – “Четлари синган. Демак улар болаларнинг лабини, лунжини тилини кесиш эҳтимоли бор. (МТТМлар) тегишли талабларга риоя этмаган. Термометрлар мавжуд бўлсада, озиқ-овқатлар талаблар асосида сақланмаган, махсус хоналар жиҳозланмаган. Фақат негатив ҳолатлар кузатилди. Назаримда 4 тумандаги мутасаддиларга нисбатан қаттиқроқ чоралар кўриш керак, токи бу бошқаларга ибрат бўлсин”.
Нурмат Отабековнинг айтишича, Сенат ишчи гуруҳи бориб кўрган Мактабгача таълим ташкилотлари ишлаши керак эмас, уларнинг фаолиятини дарҳол тўхтатиш керак.
