Йил охиригача барча ҳудудларда “112” ягона диспетчерлик хизмати ишга тушади
Шунингдек, ягона диспетчерлик хизматининг вазифалари ҳам белгиланди.
2024 йилнинг якунига қадар барча ҳудудларда ягона диспетчерлик хизмати ишга туширилади.
“112” ягона диспетчерлик хизмати фаолиятини ташкил этиш тўғрисида”ги Ҳукумат қарори (304-сон, 29.05.2024 й.) қабул қилинди.
Қарорга кўра, ҳодиса ва фавқулодда вазиятлар рўй берганда шошилинч ёрдам кўрсатиш учун “112” қисқа рақам орқали фуқароларнинг чақирувларини қабул қилиш ва автоматлаштирилган тарзда қайта ишлаш имконини берувчи ягона диспетчерлик хизмати ташкил этилади.
“112” ягона диспетчерлик хизмати Ички ишлар вазирлиги, Фавқулодда вазиятлар вазирлиги, Соғлиқни сақлаш вазирлиги, Ўзбекистон Республикаси Президенти ҳузуридаги Ижтимоий ҳимоя миллий агентлиги ҳамда “Ҳудудгазтаъминот” акциядорлик жамиятининг шошилинч хизматларини маълумотларни узатишнинг ягона тармоғига бирлаштирган ҳолда республиканинг барча ҳудудлари бўйича шошилинч ёрдам чақириқларини қабул қилиш ва қайта ишлаш, аҳолига шошилинч ёрдам кўрсатиш фаолиятини бошқаришнинг ягона тизими ҳисобланади.
Қуйидагилар “112” ягона диспетчерлик хизматининг асосий вазифалари этиб белгиланди:
- фуқароларнинг чақирувларини қабул қилиш ва автоматлаштирилган тарзда қайта ишлаш, уларга бепул асосда шошилинч, тез ва кечиктириб бўлмайдиган ёрдамни ташкил этиш ва кўрсатиш;
- шошилинч ёрдам кўрсатишни бошқариш ва мувофиқлаштириш;
- вазирлик ва идораларнинг шошилинч хизматлари томонидан фуқароларга ўз вақтида ёрдам кўрсатилиши юзасидан тизимли назорат юритиш;
- вазирлик ва идораларнинг шошилинч хизматлари ўртасида яқиндан ахборот алмашинуви бўйича тезкор ўзаро ҳамкорликни таъминлаш.
“112” ягона диспетчерлик хизмати қуйидаги муддатларда босқичма-босқич ишга туширилади:
- 2024 йил 1 июндан Тошкент шаҳри ва Тошкент вилоятида;
- 2024 йил биринчи ярим йиллигида Андижон, Наманган ва Фарғона вилоятларида;
- 2024 йил якунига қадар Қорақалпоғистон Республикаси ва қолган вилоятларда.
Таъкидлаш керакки, аввалроқ Президент топшириғи бўйича 2024 йил 1 январдан Тошкент шаҳрида, 1 июлга қадар водий вилоятларида, 2024 йил якунига қадар эса барча туман ва шаҳарларда бу тизим ишга туширилиши шартлиги белгиланганди.
Шунингдек, Platina.uz ҳам ягона қутқарув хизмати бўйича батафсил тўхталиб ўтганди.
