Сирдарё ҳокими уй-музей ва хизмат автомобилларини таъмирлаш учун пул ажратди

Сирдарё вилояти ҳокими Акмалжон Маҳмудалиев 4 апрел кунининг ўзида маблағ ажратиш бўйича иккита фармойишни имзолади. 

Биринчи фармойиш билан  Мирзаобод туманида жойлашган шоир Тўра Сулаймон уй-музейи биносини реконструкция қилиш, қўшимча бинолар қуриш ва атрофини ободонлаштириш, шоир ҳайкалининг постаментини барпо этиш билан боғлиқ харажатлар учун 2 млрд сўм ажратилади. Маблағ вилоят бюджетининг эркин қолдиқлари ҳисобидан "Ягона буюртмачи хизмати" ДУКка берилади. 

Иккинчи фармойиш билан вилоят ҳокимлиги балансида бўлган LAND CRUSER PRADO автомобилини зарур жиҳозлар билан таъминлаш харажатларига вилоят бюджети захира жамғармаси маблағлари ҳисобидан 19 млн. сўм берилади. Вилоят ҳокимлиги Ишлар бошқармаси ажратилган маблағдан самарали фойдаланишни таъминлаши керак бўлади. 

Эслатиб ўтамиз, аввал Акмалжон Маҳмудалиев агентлик биноси учун 2 млрд. сўм ажратганди. Таъкидлаш керакки, ўтган феврал ва март ойида Сирдарё ҳокими радарлар тўлови учун 1 миллиард сўм, қарзлар тўлови учун аввал 3,5 млрд, сўнгра 3,8 млрд. сўм пул ажратганди.