Сирдарё ҳокими агентлик биноси учун бюджетдан икки миллиард сўм ажратди

Сирдарё вилояти ҳокими Акмалжон Маҳмудалиев Билим ва малакаларни баҳолаш агентлигининг вилоятда қурилган янги биноси учун 2 млрд. сўм ажратди. 

Ҳоким фармойиши, бугун, 3 апрел куни эълон қилинди. 

Маблағ бинонинг ташқи коммуникация тармоқлари, ота-оналар кутиш зали, ҳожатхона, ободонлаштириш ишлари ва бошқа харажатлар учун сарфланади. Пул маҳаллий бюджетнинг эркин қолдиқ маблағларидан "Ягона буюртмачи хизмати" ДУКка берилади.

Маблағнинг нималарга сарфлангани бўйича маълумотлар ҳокимлик веб-сайтида эълон қилинади.

Таъкидлаш керакки, ўтган феврал ва март ойида Сирдарё ҳокими радарлар тўлови учун 1 миллиард сўм, қарзлар тўлови учун аввал 3,5 млрд, сўнгра 3,8 млрд. сўм пул ажратганди.