Россияда хорижликларнинг мамлакатда бўлиш муддати бир йилда 90 кунгача қисқартирилади
Мамлакат Ички ишлар вазирлигига кўра, мазкур масала бўйича қонун лойиҳасини ишлаб чиқиш якунланган.
Россия Ички ишлар вазирлиги вакили Ирина Волк департамент миграция соҳасида давлат назоратини кучайтириш бўйича қонун лойиҳаси устида ишлашни якунлаганини маълум қилди. Унинг сўзларига кўра, қонун хорижликларни биометрик маълумотларни тақдим этишга мажбур қилади ва уларнинг мамлакатда бўлиш муддатини йилига 90 кунгача қисқартиради.
"Миграция соҳасидаги кенг қамровли қонун лойиҳаси хорижий фуқароларнинг айрим ҳуқуқларини чеклаш ва уларга қўшимча масъулият юклаш билан боғлиқ чора-тадбирларни амалий амалга ошириш учун зарур шарт-шароитларни яратади", — деб ёзди Ирина Волк Телеграм-каналида.
Янги қоидалар чет эл фуқаросининг рақамли профилини ва иш берувчилар ва чет эллик ишчилар реестрини яратишни ўз ичига олади. Россияга киришда бошқа давлат фуқаролари ҳам биометрик маълумотларни тақдим этишлари ва маҳаллий қонунлар бузилган тақдирда мамлакатга кириш ҳуқуқи чекланганлиги кўрсатилган содиқлик шартномасини имзолашлари керак бўлади. Бундан ташқари, бугунги кунда берилган яшаш ва ишлаш учун рухсатномаларни алмаштириш учун ягона ҳужжат яратилади.
Қонун лойиҳасига кўра, хорижликларни Россиядан чиқариб юбориш ҳам судлар томонидан жазо тариқасида, ҳам ижро ҳокимияти органлари томонидан мажбурлаш тарзида амалга оширилади. Чет эл фуқароларининг қолишини полиция назорат қилади.
Ҳозирда чет элликлар Россия ҳудудида ярим йил ичида 90 кунгача вақтинча ташриф буюра олади. Қонун тасдиқланса, муддат бир йилга узаяди.
Эслатиб ўтамиз, 22 март куни Москва яқинидаги "Крокус Сити Холл"да содир этилган терактдан сўнг Россияда миграция сиёсатининг кескинлашуви муҳокама қилина бошлади. Теракт оқибатида тўққиз тожикистонлик ва бир қирғизистонлик айланувчи сифатида қамоққа олинди.
Аввалроқ Россия президенти Владимир Путин ҳам миграцияси соҳасида назоратни кучайтириш кераклигини айтганди.
