БМТ Хавфсизлик кенгаши Ғазода ўт очишни тўхтатиш бўйича резолюцияни қабул қилди
Исроил бош вазири АҚШ ҳужжатга вето қўймаганидан норози бўлди ва Вашингтонга делегация сафарини бекор қилди.
БМТ Хавфсизлик кенгаши Ғазо секторида зудлик билан ўт очишни тўхтатишга чақирувчи резолюцияни қабул қилди.
Бу 2023 йил октябр ойида Ғазода уруш бошлангандан буён БМТ Хавфсизлик Кенгаши томонидан маъқулланган биринчи шундай чақириқдир.
Илгари АҚШ Хавфсизлик кенгаши резолюцияларига қарши чиққан бўлса, бу сафар Вашингтон вакили овоз беришда бетараф қолди.
Аввалроқ Вашингтон таклиф этган резолюцияга Хитой ва Россия қарши чиққан эди. У ўт очишни тўхтатишни кўзда тутмасди.
Ўз навбатида Исроил бош вазири Бинямин Нетаняху Вашингтон БМТ Хавфсизлик кенгашида Рамазон ойида Ғазо секторида зудлик билан ўт очишни тўхтатишни талаб қилувчи резолюцияга вето қўймагани учун Исроил делегациясини АҚШга юбормасликка қарор қилди. Бу ҳақда Reuters Исроил ҳукумати раҳбари идорасига асосланиб хабар берди.
24 март куни кечқурун Нетаняху, агар АҚШ Ғазо секторида гаровга олинган исроилликларни озод қилиш бўйича ўз позициясидан воз кечса, у Исроилдан делегация юбормаслигини очиқ айтди.
"Қўшма Штатлар бугун гаровга олинганларни озод қилмасдан ўт очишни тўхтатишга чақирувчи резолюцияга вето қўймади", - дейилади хабарда.
Нетаняхунинг айтишича, Вашингтон резолюцияга вето қўймагани ўзининг аввалги фикридан "четга чиқиш" бўлиб ва ҲАМАСга қарши ҳарбий ҳаракатларга ва 130 дан ортиқ гаровга олинганларни озод қилиш ҳаракатларига зарар етказмоқда.
Оқ уй матбуот котиби Жон Кирби БМТ Хавфсизлик кенгашида овоз беришда бетараф қолиш қарорига қарамай, АҚШ сиёсати ўзгармаганини таъкидлади. Унинг айтишича, АҚШнинг Нетаняху қароридан сўнг ҳафсаласи пир бўлган.
Эслатиб ўтамиз, Исроил ҳукумати Ғазо жанубидаги Рафаҳ шаҳрида операция ўтказишга тайёрланмоқда. Агар бу амалга ошса, қурбонлар сони янада ошиши, гуманитар ҳалокат содир бўлиши мумкин.
