ДХХ Гулистон тумани собиқ ҳокимини қўлга олди
Туманда икки фуқаро 300 минг доллар ер сотаётганда ушланган, уларнинг собиқ ҳокимга алоқадорлиги маълум бўлган.
ДХХ ер майдонларини ноқонуний сотмоқчи бўлганларни ушлади. Улар орасида собиқ ҳоким ҳам борлиги маълум қилинган.
Гулистон туманида 38 сотих ерни 300 минг АҚШ долларига сотмоқчи бўлган икки нафар фуқаро ДХХ томонидан ўтказилган тезкор тадбирда келишилган пулнинг 50 минг долларини олаётганда қўлга олинди.
Терговга қадар текширув давомида ушбу ноқонуний ишга 2018-2021 йилларда Гулистон тумани ҳокими лавозимида ишлаган шахс ҳам алоқадор экани аниқланган.
Самарқанд вилояти, Нуробод туманида эса фермер хўжалиги раҳбари ва ҳисобчиси 49 йилга ижарага берилган ерни 70 минг АҚШ долларига сотишга келишиб, шундан 35 минг доллар олаётганда ушланди.
Қашқадарёнинг Қамаши туманида фермер хўжалиги раҳбари кластерга тегишли мулкни ҳатлаб бериш эвазига 500 миллион талаб қилади. У ҳам 20 минг доллар ва 100 миллион сўм олаётганда қўлга олинди.
Самарқанд вилояти, Оқдарё туманининг собиқ ҳокими ҳам тадбиркордан 200 минг АҚШ доллари олаётганда қўлга олинганди.
