Покистон собиқ бош вазири яна 10 йилга "кесилди"
Суд қарори сайловлар арафасида чиқарилди, энди Хон уларда қатнаша олмайди.
Покистон суди сешанба куни собиқ бош вазир Имрон Хонни давлат сирларини ошкор қилганликда айблаб, 10 йиллик қамоқ жазосига ҳукм қилди. Бу ҳақда BBC хабар бермоқда.
Айблов хулосасига кўра, Хон Покистоннинг Вашингтондаги элчисининг ҳукуматга юборган махфий телеграмма мазмунини ошкор қилган.
Собиқ бош вазирнинг партияси бу айбловни уйдирма деб ҳисоблайди ва ҳукмга эътироз билдирмоқчи, деб хабар бермоқда Reuters.
2022 йилда бош вазирлик лавозимидан четлатилган Хон, аввалроқ коррупцияда айбланиб, уч йиллик қамоқ жазосига ҳукм қилинган. Ҳукм 2023 йил августида чиқарилган.
Энди янги ҳукм умумий сайловларга бир ҳафта қолганида эълон қилинди, энди Имрон Хоннинг сайловда қатнашиши тақиқланади. Хон ўзига қўйилган барча айбловларни сиёсийлаштирилган деб атайди.
Таъкидлаш жоиз, 2023 йил августда Хон ўз лавозимида бўлган вақтида чет эл раҳбарларидан олинган совғаларни сотишда айбланганиб, уч йил қамоққа ҳукм қилинганди.
Имрон Хоннинг май ойида бошқа ҳолатда ҳибсга олиниши собиқ бош вазир тарафдорлари ва полиция ўртасида тартибсизликлар ва шиддатли тўқнашувларга олиб келганди.
Ўшанда у ер билан боғлиқ фирибгарликларга алоқадор деб топилиб, қамоққа олинганди. Намойишлардан сўнг Имрон Хон гаров эвазига озод этилганди.
